मातृ दिवस पर विशेष

मातृ दिवस पर कवि दलबीर फूल की मार्मिक रचना

कवि दलबीर फूल का बचपन का छायाचित्र

माँ

एक बार माँ कहणे तैं- ही , हार उतरज्यां सारी 

करकै दर्शन मनहो परशन,हटजां सभी बिमारी

नो  मिहने  तक पेट माण्ड कै, म्हारा बोझा ढोवै

कुल की बेल बधावण खात्यर नूर निराला़ खोवै

बेट्ट़ा- बेट्ट़ी जामण नै माँ , ज्यान जंग मैं झोवै

सरद-गरम का मरम हो जाप्पा,मलमूत्र भी धोवै

नही पीठ फेर कै सोवै,हो ओलाद ज्यानतै प्यारी 

करकै दर्शन मन हो परशन,हटजां सभी बिमारी..

औलाद की खात्य़र रुप धारले,देखो माँ काली़का

एक मिन्ट न ढिल्ला छोड़ै चोखा काम रुखाली़का

पाल़पोश बलवान बणादे,अपणा भोजन थाली़का 

दशों दिशा मैं करै चादणा बणकै दीप दिवाली़ का

रूप बणा कै माल़ी का,सदा देख - रेख करै म्हारी

करकै दर्शन मन हो परशन, हटजां सभी बिमारी..

पढा लिखा संस्कार सिखा ,माँ पूरा फरज पुगाती

चढ घोड़ी पै ब्याहवण जाता , माता दूद्ध़ी प्याती

लाज राखिये दूध मेरे की, माता पीठ थप-थपाती

ब्याह कै ल्यावै बेटा बहू नै हो माँ की चोड़ी छाती

जीवै जिब तक प्यार निभाती माँ ममता की झारी

करकै दर्शन मन हो परशन,हटजां सभी बिमारी...

अगम -निगम पुराण हारग्ये,माँ का अर्थ बताणेमैं 

गावणिये सब रहे अधूरे , माँ  की  महिमा गाणेमैं 

होज्यां  वारे  न्यारे म्हारे , माँ  को शीश झुकाणेमैं

फूल तेरी कोशिश थोड़ीसी माँके भजन बणाणेमैं 

माँ का  करज चुकाणे मैं ,खुद हार गया न्याकारी 

करकै दर्शन मनहो परशन,हटज्यां सभी बिमारी..

 लोक कवि दलबीर 'फूल' गाँव लिसान

  जिला रेवाडी़ हरियाणा पिन कोड 123411